પૂર્વ બિગ બોસ સ્પર્ધક એજાઝ ખાન મહારાષ્ટ્ર વિધાનસભા ચૂંટણીમાં વર્સોવા બેઠક પરથી ચૂંટણી લડી રહ્યા છે, જ્યાં તેઓ મતોની દ્રષ્ટિએ માંડ-માંડ ત્રણ આંકડા સુધી પહોંચી શક્યા છે. 5.6 મિલિયનથી વધારે ઇન્સ્ટાગ્રામ ફોલોઅર્સ ધરાવતા એજાઝ ખાન 18 રાઉન્ડ બાદ માત્ર 131 વોટ મેળવવામાં સફળ રહ્યા. ચૂંટણી પંચની વેબસાઈટ અનુસાર વર્સોવા સીટ પર શિવસેનાના યુબીટી ઉમેદવાર હારૂન ખાન 46,619 વોટ સાથે આગળ ચાલી રહ્યા છે. એજાઝ ખાન NOTAના વિકલ્પથી પણ પાછળ ચાલી છે, જેને વર્સોવા મતવિસ્તારમાં 747 મતદારોએ વોટ આપ્યો. મતવિસ્તારમાં મતદાનની ટકાવારી 51.2% હતી.
આ હકીકતની વિડંબના તો એ છે કે 5.6 મિલિયનથી વધુ Instagram ફોલોઅર્સ ધરાવતો લોકપ્રિય અભિનેતા એજાઝ ખાન માત્ર 131 મત મેળવવામાં સફળ રહ્યો, પણ સોશિયલ મીડિયા પર કોઈ નુકસાન નથી થયું. પરંપરાગત રીતે કોંગ્રેસનો ગઢ ગણાતી વર્સોવા બેઠક પરથી કુલ 16 ઉમેદવારોએ ચૂંટણી લડી. એજાઝ ખાને આઝાદ સમાજ પાર્ટી (કાંશીરામ)ની ટિકિટ પર મહારાષ્ટ્ર વિધાનસભાની ચૂંટણી લડી હતી. ગુજરાતના અમદાવાદમાં જન્મેલા, દિયા ઔર બાતી હમ અને કરમ અપના અપના જેવા શો સાથે લોકપ્રિય ટેલિવિઝન અભિનેતા એજાઝ ખાન રક્ત ચરિત્ર અને અલ્લાહ કે બંદે જેવી ફિલ્મોમાં પણ જોવા મળ્યા છે.
વિધાનસભા ચૂંટણી માટે આજે મત ગણતરી ચાલી રહી છે. મહારાષ્ટ્રમાં ભારતીય જનતા પાર્ટી (BJP)ના નેતૃત્વમાં મહાગઠબંધન 288 માંથી 217 બેઠકો પર લીડ સાથે રાજ્યમાં સત્તા જાળવી રાખવા માટે તૈયાર છે. ચૂંટણી પંચના તાજેતરના ડેટામાં આ માહિતી આપવામાં આવી છે.
મહારાષ્ટ્ર વિધાનસભા ચૂંટણી માટે 20 નવેમ્બરે મતદાન થયું હતું. વિપક્ષી મહા વિકાસ અઘાડી (MVA) ખૂબ જ પાછળ જોવા મળી રહી છે. MVA ઉમેદવારો માત્ર 51 બેઠકો પર આગળ છે જ્યારે તેના ઘણા નેતાઓએ શનિવાર સવાર સુધી મહાયુતિને હરાવવાના દાવા કર્યા હતા.
