પોલીસે પુષ્પા સ્ટાર શ્રી તેજ વિરુદ્ધ ગંભીર આરોપો બાદ કેસ નોંધ્યો છે. એક મહિલાએ અભિનેતા પર લગ્નનું વચન આપીને છેતરપિંડી કરવાનો આરોપ લગાવ્યો છે.
અલ્લુ અર્જુનની બ્લોકબસ્ટર ફિલ્મ ‘પુષ્પા: ધ રાઇઝ’માં અલ્લુ અર્જુનના ભાઈની ભૂમિકા ભજવીને ફેમસ થયેલા તેલુગુ અભિનેતા શ્રી તેજ પર લગ્નની લાલચ આપી ઇમોશનલ, ફાઇનેંશિયલ અને શારીરિક શોષણનો આરોપ મૂકવામાં આવ્યો છે. એક મહિલાએ અભિનેતા વિરુદ્ધ હૈદરાબાદ પોલીસ સ્ટેશનમાં ફરિયાદ નોંધાવી છે.
પુષ્પા સ્ટાર શ્રીતેજ સામે કેસ નોંધાયો
એક મિડિયા અહેવાલ મુજબ પીડિતાએ 25 નવેમ્બર 2024ના કુકટપલ્લી પોલીસ સ્ટેશનમાં ફરિયાદ નોંધાવી છે. મહિલાએ તેની ફરિયાદમાં જણાવ્યું છે કે શ્રીતેજે તેને સંબંધમાં ફસાવી, લગ્નનું વચન આપ્યું અને 20 લાખ રૂપિયાનું આર્થિક શોષણ કર્યું. તેણે દાવો કર્યો હતો કે તેની સાથે સંબંધ હોવા છતાં તે અર્ચના નામની અન્ય મહિલા સાથે સંબંધમાં હતો અને તેનાથી તેનો સાત વર્ષનો પુત્ર પણ છે.
પીડિતાએ એવો પણ આક્ષેપ કર્યો હતો કે તેણે આ વર્ષે એપ્રિલમાં પ્રથમ ફરિયાદ નોંધાવી હતી, પરંતુ અભિનેતાના પરિવારે તેને યોગ્ય પગલાં ભરવાની ખાતરી આપ્યા બાદ તેને પાછી ખેંચી લીધી હતી. તેણે દાવો કર્યો હતો કે અગાઉ માધાપુર પોલીસ સ્ટેશનમાં ફરિયાદ નોંધાવવા છતાં કોઈ કાર્યવાહી કરવામાં આવી ન હતી. પોલીસે હવે આરોપો શોધવા અને પીડિતાને ન્યાય આપવા માટે તપાસ શરૂ કરી છે.
પોલીસે શ્રીતેજ સામે આ કલમો હેઠળ ગુનો નોંધ્યો
પીડિતાની ફરિયાદના આધારે પોલીસે પુષ્પા સ્ટાર વિરુદ્ધ બીએનએસ 69, 115(2), અને 318(2) સહિત અનેક કલમો હેઠળ કેસ નોંધ્યો છે. આમ તો આ પહેલીવાર નથી જ્યારે શ્રીતેજને કાનૂની સમસ્યાઓનો સામનો કરવો પડ્યો હોય. એચડીએફસી બેંકના સિનિયર વાઇસ પ્રેસિડેન્ટ સુરેશની પત્ની અર્ચના સાથેના અફેરને કારણે તે અગાઉ વિવાદોમાં હતો.
શ્રીતેજ વર્ક ફ્રન્ટ
તમને જણાવી દઈએ કે પુષ્પા, વાંગવેતી, ધમાકા, મંગલવરમ અને બહિષ્કરણ જેવી પ્રખ્યાત તેલુગુ ફિલ્મોમાં પોતાની ભૂમિકાઓથી ઈન્ડસ્ટ્રીમાં શ્રીતેજએ પોતાની ઓળખ બનાવી છે. પરંતુ કાયદાકીય મુસીબતમાં ફસાઈ જવાને કારણે તેમની ઈમેજને નુકસાન થયું છે.