મુકેશ અંબાણીની કંપની- રિલાયન્સ ઇન્ડસ્ટ્રીઝ (RIL) એ બોનસ શેર માટે રેકોર્ડ ડેટ જાહેર કરી છે. સ્ટોક એક્સચેન્જમાં ફાઇલિંગમાં કંપનીએ 1:1 બોનસ શેરના ઇશ્યૂ માટે પાત્ર શેરધારકોને નિર્ધારિત કરવા માટે 28 ઓક્ટોબર 2024 તારીખ નક્કી કરી છે. કંપનીએ એમ પણ છે કે તેને તેની અધિકૃત શેર મૂડી વધારવા માટે શેરધારકોની મંજૂરી મળી છે. બોનસ ઇશ્યુના રિજોલ્યૂશનની તરફેણમાં મતોની કુલ ટકાવારી 99.92% હતી, જ્યારે તેની વિરુદ્ધમાં માત્ર 0.07% મતો હતા.
એજીએમમાં કરાઇ હતી જાહેરાત
મુકેશ અંબાણીની આગેવાની હેઠળની કંપનીએ તેની 28મી વાર્ષિક સામાન્ય સભા (AGM)માં 1:1 રેશિયોમાં બોનસ શેર જારી કરવાની જાહેરાત કરી હતી. અંબાણીએ એજીએમમાં કહ્યું હતું – જ્યારે રિલાયન્સ વધે છે ત્યારે શેરધારકોને સારુ ઇનામ મળે છે. સાત વર્ષમાં આ પ્રથમ મોકો છે જ્યારે કંપની બોનસ શેર આપશે. રિલાયન્સે અગાઉ સપ્ટેમ્બર 2017માં બોનસ શેર જારી કર્યા હતા. 2017માં 1:1 બોનસ શેર જારી કરતા પહેલા રિલાયન્સે 2009માં 1:1 બોનસ શેર જારી કર્યા હતા.
સપ્ટેમ્બર ક્વાર્ટરના પરિણામો કેવા રહ્યા?
ચાલુ નાણાકીય વર્ષના જુલાઈ-સપ્ટેમ્બર ક્વાર્ટરમાં રિલાયન્સ ઈન્ડસ્ટ્રીઝનો નફો પાંચ ટકા ઘટીને રૂ. 16,563 કરોડ થયો છે. એક વર્ષ અગાઉ સમાન ક્વાર્ટરમાં તે રૂ. 17,394 કરોડ હતો. કંપનીનો એબિટા બે ટકા ઘટીને રૂ. 43,934 કરોડ થયો છે. ફાઇનાન્સ કોસ્ટમાં પાંચ ટકાનો વધારો થતાં રૂ. 6,017 કરોડ થવાને કારણે કંપનીની કામગીરીને પણ અસર થઈ છે, મુખ્યત્વે ઓઇલ રિફાઇનરી અને પેટ્રોકેમિકલ બિઝનેસના નબળા પ્રદર્શનને કારણે કંપનીના નફામાં ઘટાડો થયો છે.
રિલાયન્સ શેરની સ્થિતિ
રિલાયન્સના શેરની વાત કરીએ તો બુધવારે તે રૂ. 2708 પર હતો. શેર એક દિવસ અગાઉની સરખામણીએ 0.75% વધીને બંધ થયો હતો. ટ્રેડિંગ દરમિયાન શેરનો ભાવ રૂ. 2728.55 પર પહોંચ્યો હતો. 8 જુલાઈ 2024ના શેરની કિંમત રૂ. 3,217.90 પર પહોંચી હતી. આ શેરની 52 સપ્તાહની ઊંચી સપાટી છે.
