ટીમ ઈન્ડીયામાં કિંગ તરીકે જાણીતાં વિરાટ કોહલીનો જોટો જડે તેમ નથી. અત્યાર સુધી કોહલી માટે બધું સારુ હતું પરંતુ તાજેતરમાં ન્યુઝીલેન્ડ ટેસ્ટ સીરિઝમાં મળેલી હાર બાદ અચાનક કોહલીના સિતારા ઝાંખા પડવા લાગ્યાં છે.
કોહલી ટોપ 20માંથી બહાર
ભારતીય સીનિયર બેટ્સમેન વિરાટ કોહલીને બુધવારે જાહેર કરવામાં આવેલી તાજેતરની ICC ટેસ્ટ રેન્કિંગમાં ભારે નુકસાન થયું છે. ન્યૂઝીલેન્ડ સામે ખરાબ પ્રદર્શનને કારણે કોહલી બેટિંગ રેન્કિંગમાં ટોપ-20માંથી બહાર થઈ ગયો છે. 2014 પછી આ પ્રથમ વખત છે જ્યારે કોહલી ICC ટેસ્ટ રેન્કિંગમાં ટોપ-20માંથી બહાર ગયો છે. કોહલીએ ન્યૂઝીલેન્ડ સામેની ત્રણ મેચની ટેસ્ટ શ્રેણીમાં 70 રનના સર્વશ્રેષ્ઠ પ્રદર્શન સાથે માત્ર 93 રન બનાવ્યા હતા અને હવે તે ટેસ્ટ ફોર્મેટમાં પુરુષોના બેટ્સમેનોની ICC રેન્કિંગમાં 22મા ક્રમે છે.
ન્યુઝીલેન્ડ ટેસ્ટ સીરિઝમાં હાર ભારતને ભારે પડી
ભારતના અનુભવી બેટ્સમેન વિરાટ કોહલી અને રોહિત શર્મા ન્યૂઝીલેન્ડ સામે તાજેતરમાં સમાપ્ત થયેલી શ્રેણીમાં ફ્લોપ રહ્યા હતા અને સ્પિનરો સામે સસ્તામાં વિકેટ ગુમાવી રહ્યા હતા. ટેસ્ટ ક્રિકેટના ઈતિહાસમાં ન્યૂઝીલેન્ડ પહેલી ટીમ હતી જેણે ભારતને તેના હોમગ્રાઉન્ડ પર 3-0થી હરાવ્યું હતું. ભારતીય ટીમના કેપ્ટન રોહિત શર્માએ પણ પોતાના બેટથી રન બનાવ્યા ન હતા. તેને બે સ્થાનનું નુકસાન થયું છે અને તે 26માં સ્થાને છે.
કોણ કયા સ્થાને?
ઈંગ્લેન્ડના ભૂતપૂર્વ કેપ્ટન જો રૂટ ટેસ્ટમાં બેટિંગ રેન્કિંગમાં ટોચ પર છે, તેણે પાકિસ્તાન પ્રવાસ પર બેવડી સદી ફટકારી હતી. રૂટ પછી કેન વિલિયમસન અને હેરી બ્રુકનો નંબર આવે છે. ભારતના યુવા બેટ્સમેન યશસ્વી જયસ્વાલને પણ એક સ્થાનનું નુકસાન થયું છે અને તે ચોથા સ્થાને સરકી ગયો છે. વિકેટકીપર બેટ્સમેન રિષભ પંતને પાંચ સ્થાનનો ફાયદો થયો છે અને તે છઠ્ઠા સ્થાને પહોંચી ગયો છે. શુભમન ગિલ 16માં સ્થાને છે. ભારતનો અનુભવી સ્પિનર રવિન્દ્ર જાડેજા તાજેતરની રેન્કિંગમાં બે સ્થાન ઉપર છઠ્ઠા સ્થાને પહોંચી ગયો છે. અશ્વિન પાંચમા સ્થાને છે. જાડેજાએ ન્યૂઝીલેન્ડ સામે 10 વિકેટ ઝડપી હતી. ટેસ્ટ બોલરોની સમાન યાદીમાં વોશિંગ્ટન સુંદર સાત સ્થાન આગળ વધીને 46મા ક્રમે છે, જ્યારે એજાઝ પટેલ (12 સ્થાન ઉપરથી 22મા ક્રમે) અને ઈશ સોઢી ત્રણ સ્થાન આગળ વધીને 70મા ક્રમે છે.
